مكتبة الفنان أبوعركي البخيت

وعـــــــــــد

********
بوعدك ياذاتي يا أقرب قريبة
بكرة أهديك دبلة الحب والخطوبة
وعد من قلبي وإردتي
ومن ضميري
مافي زول أجبرني
ماشاورت غيري
كل كلمه أقولا
بتصور شعوري
هي البريدة
وهي حتواجه مصيري

مين يفرق بين حبايب نادى شوقهم
الأمل زاد العواطف في طريقهم
كل زول في الدنيا شايفنو بيريدهم
والمحبة البانية رامية ظلالا فوقهم

نظـــــرات عـــــــيونك

*******
نظرات عيونك
نظرات عيونك سورت بوميض مشع
أسرت قلب مرتاح زمن
من لوعة العشق البيرسل
من عيون مليانة حب

نظرات عيونك
صحت الغنا في الحنايا
وعمرت آه فينى الدوايا
وجددت فينى الطرب

أهي دى العيون الفيها
كل الكون بيتجمع ضياهو
وأهو دا الجمال الفيهو
بنسى الزول شقاهو

أهي دى العيون وأهو دا الحمال
اهو دا الزمن أنحنا عشاق لي زمنا
باللي فيهو وبالعليهو
وبالمعــــــــــاهو
وأنحــنا عشاق ليكي إنتـــــي

أهلــــــي الغــــــــبش

**********
ديل اهلى الغبش .. دقشاً بكير مرقو النفير
شالو النهار حتى العصير
ما كل يوم ولاقصريوم

أمل الغبش ينزل سحاب
يروى الأرض ويحيى التراب
العيش يطول وقت الحصاد
زراً غزير ما أنضرو

صحا الخــريف
والفرحة ضوت فى العيون
هان التعـــــب
والدمعة جفت فى الجفون

كان العشم عشم الغبش
الزرع يطول فوق ما يقصرو
لكـــن حصل و الليل سهاد
جاهم جراد أكل الحصاد

فاتو ناس بين الكساد
شالو العقاب وما فضلو
ديل اهلى الغبش وين يشدو ويقبلو
ديل اهلي الغبش وين يشدو ويرحلو